असोज ७ अछाम ।

न्याय हेल्थ नेपालद्धारा संचालित बयालपाटा अस्पताल अछामले नयाँ भवनबाट आफ्ना सेवाहरु सुरु गरेको छ । सुबेदी कन्ट्रक्सन जेभीएको निर्माण टोलीले आकस्मिक तथा प्रयोगशाला भएको भवन निर्माण पछि अस्पताललाई हस्तान्त्ररण गरेसंगै सेवा सुरु गरिएको हो भने यसअघि अस्पतालका लागि अन्तरंग तथा बहिरंग बिभागको निर्माण कार्य सम्पन्न भई संचालनमा आईसकेका छन् ।

आज आईतबार निर्माण टोलीले आकस्मिक तथा प्रयोगशाला भवनको साँचो अस्पताललाई हस्तान्त्ररण गरेसंगै सेवा सुरु गरिएको हो । उक्त भवनमा आकस्मिक, प्रयोगशाला, एक्सरे, फामेर्सी तथा बिरामी नाम दर्ता लगायतका सेवा सुरु भएका छन । अब नयाँ भवन हस्तान्तरण भए संगै बिरामी लै सेवा प्रदान गर्न सह हुने किल्निकल तथा सेवा प्रबन्धक ओमकार अधिकारीले बताउनु भयो । उहाले भन्नु भयो  पुरानो भवन सानो भएकाले सहज सेवा दिन कठिनाई भएको थियो अव सेवा लिन र दिन दुवै सहज हुनेछ । अस्पतालका अनुसार करिब ५ महिनाको अवधिमा उक्त भवन निर्माण कार्य सम्पन्न भएको हो ।

अब बाँकी रहेका भवन निर्माणको काम पनि समयमै सकिने बयालपाटा अस्पतालका सिनियर ईन्फास्टक्चर एसोसिएट  जीवन बोहराले बताउनु भयो । शल्यक्रिया विभागको काम अन्तिम चरणमा रहेको छ भने गर्भवती चेकजाँच भवन निर्माणको काम पनि समयम सिमा भित्रै सकिने लक्ष्य राखिएको समेत उहाँले बताउनु भयो । निरन्तरको प्रयास र कन्ट्रक्सन टोलीको मेहनतले काम समयमै सम्पन्न भएको समेत बोहराले बताउनु भयो ।

नेपाल सरकारको सहयोग तथा न्याय हेल्थ नेपालको लगानीबाट भईरहेको भवन निर्माणको कार्य सुबेदी कन्ट्क्सन जेभीले गरिरहेको न्याय हेल्थ नेपालका लागि प्रदेश प्रमुख (निर्देशक) डाक्टर सन्तोष कुमार ढुंगानाले बताउनु भयो । अस्पतालले एम्बुलेन्स सेवा बाहेक अरु सबै स्वास्थ्य सेवा निशुल्क रुपममा प्रदान गरिरहेको छ ।  आज भएको भवन हस्तान्त्ररण समारोहमा साँफेबगर नगरपालिका वडा नं. ७ का अध्यक्ष मिट्ठु भाट प्रमुख अतिथि रहनु भएको थियो ।

प्रमुख अतिथी भाटले आफ्नै वडामा अस्पतालले देशकै नमुना भवनहरु निर्माणगरी निशुल्क स्वास्थ्य सेवा प्रदान गरिरहेकोमा खुसी व्यक्त गर्नुभयो । साँफेबगर नगरपालिकाको वडा नं. ७ विकास र राजनितिका हिसाबले पनि सबैभन्दा अगाडी रहेको भन्दै अध्यक्ष भाटले स्वास्थ्यमा पनि देशकै नमुना भएको प्रशंसा व्यक्त गुर्नभयो ।

साथै उहाँले अस्पताल वरिपरिको बजारलाई व्यवस्थित बनाउन पहल गर्ने र आन्तरिक श्रोतबाट अस्पताललाई गर्न सकिने सहयोग सदैब गर्न पछि नहट्ने समेत प्रतिबद्धता व्यक्त गर्नुभयो । हस्तान्त्ररण कार्यक्रममा अस्पतालका मेडिकल निर्देशक डाक्टर बिकाश गौचन लगायत सबै कर्मचारीहरुको सहभागिता रहेको थियो ।